Um okkur

Guðrún Halla er alin upp í miðbæ Reykjavíkur en flutti um skeið norður á land og útskrifaðist frá Menntaskólanum á Akureyri. Hún stundaði fótbolta og frjálsar íþróttir á uppvaxtarárum og hefur mikið ferðast í gegnum tíðina - bjó meðal annars í Guatemala sem skiptinemi og á Ítalíu í 3 ár. Eftir að hafa svalað ævintýraþörfinni kom Guðrún aftur heim og lærði einkaþjálfun hjá Keili ÍAK. Þar kviknaði áhuginn á að læra meira um líkamann og hún sótti um í sjúkraþjálfun hjá Háskóla Íslands. Þjálfun hefur alltaf verið stór hluti af lífi Guðrúnar og þjálfaði hún m.a. hjá Spörtu heilsurækt í mörg ár, vann á heilbrigðissviði Eirbergs og hefur einnig unnið með íþróttaliðum sem styrktarþjálfari og sjúkraþjálfari. Eftir krefjandi meðgöngu kviknaði mikill áhugi á því að dýpka þekkingu á sviði kvenheilsu og finna leiðir til að efla konur í sömu spörum. Guðrún á eina 5 ára dóttur. Í dag starfar hún hjá Kjarna sem sjúkraþjálfari, kennir mömmuþjálfun, er sjúkraþjálfari hjá yngri landsliðum hjá KSÍ og sinnir móðurhlutverkinu.

Nadia er fædd í Kaliforníu og ólst upp í Garðabænum frá 10 ára aldri. Hún stundaði listskauta í mörg ár og tók þátt í alþjóðlegum mótum m.a. með landsliðinu. Hún byrjaði snemma að þjálfa og áhuginn jókst mikið á styrktarþjálfun og forvörnum í íþróttum. Nadia er með full þjálfararéttindi frá ÍSÍ og Skautasambandi Íslands og hefur unnið ýmis störf fyrir Skautafélag Reykjavíkur. Eftir að hafa sjálf þurft að hætta í skautum vegna meiðsla ákvað hún að sækja um nám í sjúkraþjálfun hjá Háskóla Íslands eftir útskrift úr Menntaskólanum í Reykjavík. Í gegnum árin hefur hún komið að þjálfun listskautara auk fjölbreyttrar þjálfunar almennings í Hreyfingu heilsurækt og starfað sem sjúkraþjálfari hjá ýmsum íþróttaliðum. Nadia á eina fjögurra ára dóttur og eins árs son. Áhugi hennar á sviði kvenheilsu jókst mikið í kjölfar fæðingar dóttur sinnar og því ferli sem tók við að byggja sig aftur upp eftir meðgöngu. Í dag starfar hún hjá Kjarna sem sjúkraþjálfari, kennir mömmuþjálfun, kennir fjölbreytt námskeið í Hreyfingu, er styrktarþjálfari fyrir skautaiðkendur og sinnir móðurhlutverki.

Hildur er fædd og uppalin í Hafnarfirði. Hún stundaði fimleika í mörg ár,  áhaldafimleika frá 5 ára aldri en færði sig síðar yfir í hópfimleika á unglingsárunum. Áhugi á mannslíkamanum og almennri heilsu kveiknaði fljótt og eftir útskrift úr Kvennaskólanum í Reykjavík sótti hún um nám í sjúkraþjálfun við Háskóla Íslands. Forvitni og ævintýraþrá einkenna Hildi, sem flutti m.a eitt sumar til Afríku sem sjálfboðaliði þar sem hún vann með bæði börnum og fullorðnum. Eftir útskrift frá HÍ flutti hún einnig til Ítalíu þar sem hún stundaði nám í innanhússhönnun. Leiðin lá þó alltaf heim til Íslands. Hildur hóf störf hjá Sjúkraþjálfun Íslands síðastliðið sumar þar sem hún sinnir fjölbreyttum hópi skjólstæðinga ásamt því að halda utan um námskeið fyrir 67 ára og eldri. Meðfram námi þjálfaði hún einnig og hélt utan um námskeiða hjá Hreyfingu heilsurækt. Hildur á eina nýfædda stúlku og er í fæðingarorlofi. Hún hefur verið þjálfari hjá Orka Studio síðan 2024 ásamt því að vinna sem sjúkraþjálfari.

Lív fæddist í Svíþjóð en flutti ung til Íslands þar sem hún hóf ballettnám samhliða grunnskóla. Dansinn varð fljótt hennar helsta ástríða og lauk hún listdansbraut frá Listdansskóla Íslands samhliða námi við Menntaskólann við Hamrahlíð. Að loknu framhaldsskólanámi lá leiðin til Hollands þar sem hún lauk BA-nám í samtímadansi og kóreógrafíu við ArtEZ Hogeschool voor de Kunsten. Þar kynntist hún Pilatesþjálfun og styrktarþjálfun sem vakti áhuga hennar á líkamsþjálfun og endurhæfingu. Lív flutti aftur til Íslands í lok árs 2020 og hóf í kjölfarið nám í sjúkraþjálfun við Háskóla Íslands. Á meðgöngu kynntist hún þjálfun fyrir verðandi mæður og upplifði sjálf hversu jákvæð áhrif hreyfing getur haft á líðan á meðgöngu og eftir fæðingu. Í kjölfarið jókst áhugi hennar á kvenheilsu og mömmuþjálfun enn frekar. Lív hefur starfað við þjálfun frá menntaskólaaldri, fyrst sem danskennari, og hefur einnig kennt meðgöngusund frá árinu 2025. Hún útskrifast úr sjúkraþjálfun sumarið 2026 og vinnur nú að meistaraverkefni á sviði kvenheilsu.